c’est la vie

呢個星期冇乜時間睇電視，錯過好多精彩片段：

Oscar：除左 Babel 同 Blood Diamond，今年最關心都算係 Departed。結果 Departed 得到四個奬，老老實實，香港人無不認為無間道比 Departed 出色，令到我都冇心機去睇呢套抄到足既西洋片。結果，呢套戲令到馬田史高西斯得到最佳導演，都有D implications。有人話，劉偉強「帶歇」馬田史高西斯得奬，點都好，外國人拍返岩外國人口味既野無可厚非，至少香港劇本得到荷李活認到，都唔錯丫。講到底，Brad Pitt 都好，不過劉德華更好！！「竊聽者」事實上係比波濤胸湧黃金甲好喎（真係得架！）。而海倫美蘭就更加令我想睇 The Queen ，唔明點解真人同戲裡面個樣爭咁遠。

財政預算：退稅，免差餉，我唔多唔少有點受惠，加加埋埋夠買個手袋仔威下。唔知點解，市民反應竟然不及當年曾特首當財爺時退返三千蚊支票高興（面額爭好遠喎）。諗返又係，當日手執一張支票，都幾開心，但計落，橫掂我未交稅，如果政府即刻準我交少萬五蚊，我會更開心。我而家反而擔心，下年我無福享受呢粒糖。

答問大會：人地係會展答問，我就係會展春茗，攪到我睇唔到答問大會有幾精彩。袋巾窒到煲呔飛起，傳媒就讚到袋巾上天，終於證明，香港人選擇唔只一個，有競爭先有進步，就算輸至少都執返身彩。其實最得益係張堅庭，訓練出一個政治演說家，相信好快好多大 corp 爭住搵佢做 training。

以上片段，我一滴都冇睇過，幾乎全部都係聽收音機聽返黎，只聽不睇，實在可惜。